تكنولوجيا البكيات

أصالة عن شخصي الضعيف ونيابة عنكم إنتو عايز أقترح اقتراحات للبكيات في عصر العولمة لأن شيل الفاتحه بقا ما عندو أي معنى (مده إيد وبعد دقايق هاك يا ونسات)
ما داير أطول عليكم المقدمات فإلى المقترحات:-
1/ أقترح عدم السفر لأي بكا (إلا إذا كان الميت قيبك شدييييييد يعني ولدو وكده ... لماذا
ممكن نستبدل السفر بتحويل رصيد (حق التذاكر والمواصلات) في أي من الشبكات العاملة في السودان لأهل البكا علما بأن الفائدة هنا أنفع لأهل البكا أنفع بكثير من حضورك شخصيا لأن الميت مات ولن ولم يعود وكمان كان بقا قريبو بره السودان أحسن يرسل قروش بالبنك من يجي مدردر داير تذاكر وسفر وطيارات وعووووووووووووووووك.
2/ برضو يا أخوانا الزمن بقا زمن عولمه وسرعة في كل شيء حقو حكاية كشف دي مافي ليها داعي ...
ما البديل ...
البديل جهاز حاسوب لابتوب ونسجل أماء الجماعة والقروش في برنامج إكسل لأن الحكاية أسرع والمجموع واضح عشان ما ننسى زول وممكن نكتب بالمناطق مثلاً ناس الحصا نعمل ليهم ملف جديد والقدواب والدكة وهكذا ...........
3/ نأجر كميه من الشواحن بدلا من الكراسي لأن كل من هب ودب يحمل موبايل.
4/ يمكن لأي شخص أن يحول رصيد في أي شبكة من شبكات الاتصال العاملة بدل الكشف إذا رأى ذلك..
5/ولسرعة الوقت وحوجتنا للزمن تقدم الوجبات على شكل سندوتشات بدل من الصواني وبذلك نضمن عدم إيجار عدة كتييييرة ماليها لزموم وغسيل العدة زاتو مشكله لي بناتنا خصوصاً المتهربات منها ...
6/ في الصدقة غالباً ما توزع الأجزاء للتلاوة يمكن أن نستبدل ذلك بجهاز حاسوب (نفس الجهاز بتاع الكشف)للاستماع للقران الكريم ونكون بذلك قد وفرنا وقتاً كبيراً..
7/ في عملية حفر القبر يمكن أن نستعين بالات الحديثة ويا حبذا لو وجدت آلة بنفس مواصفات (ود اللحد) لنستفيد من الوقت خصوصاً وأن المقابر أصبحت مكان لونسات الكورة والبيع بل وإدخال واستبدال النغمات والرصييييييييييييييد.
8/ أي مقترحات أخرى من الأعضاء تجد العناية

موضوع خفيف الظل دنيا يدل علي أن صاحبه يتمتع بروح دعابه عالية وقدر لابأس به من السخرية ذكرتني بزوايا جعفر عباس الحاده .
وانا عندي ليك اقتراح بدل الاعلان في الاذاعة توفي فلان ابن علان قريب فرتكان ممكن تُرسل ( مسجات ) علي رقم كل المعنين بالامر ولا من دري ولا من شاف