أميرة تشرف كرسينا الساخن

دنيا كتب:أميرة ها بيك
أولا عرفينا بى بطاقتك الشخصية

مرحب بيك اختى دنيا وانا حقيقة ماعارفة بتقصدى شنو بالبطاقة رغم انك عفيتينى من الاسم والعمر

على العموم الاسم اميرة

سودانية مية الميه والجنس شايقية وافتخر

من مدية بحرى شرق النيل والان مقيمة فى قطر الدوحة

بكلاريوس اداب قسم فلسفة

وممكن تدسي الاسم والعمر
وهل انتى متزوجة ولا لا

نعم انا متزوجة والحمد لله

ولو متزوجة بتحبى زوجك

بالتاكيد بحب زوجى وتزوجنا عن حب

بس ما يكون معانا هنا

والله معانا هنا وعلم على راسه نار

وهل انتى شغالة ولا لا

ابدا انا ماشغالة وحاولت اشتغلت كم مرة بس الشغل والبيت صعب فى الغربة

ولو شغالة شغالة شنو
ولو أدوك اتنين عريس مليان قروش وعريس مليان حب
بتختارى ياتو

والله بختار المليان حب وياحبزا لو مليان من الاتنين هههههههههه

ولى ثوانى بس اتخيلى معاى انك أم

والله الحكاية مادايره خيال انا فعلا ام واحساس الامومة احساس جميل ومقدس ولا يضاهيه احساس

ولو خيروك بين فراق زوجك وفراق ابنك

والله بكل صراحة ووضوح بختار فراق زوجى لانى ذكرت لكى اعلاه ان الامومة احساس مقدس

بتختارى شنو
وانى خيرتك فاختارى

وانا اخترت واتمنى ان اكون وفقت فى اختياراتى

وليك شكرى وراااااجعة ليك تانى

زول حلفا كتب:أزيك يا اميرة أخلصي من دنيا وانا بجيك راجع

مها عمر كتب:أميرة سلامات
شايفة حروفى دى ناوية ليك نية ما تمام
وزى ما قالو ليك فى ناس محرشين عليك أنا واحدة منهم
وخلصى دنيا ورجعى ليها باقيها
وزول حلفا ليك بالمرصاد
وجهزى حالك لى
وأولها ما تدسى اسمك ولا عمرك

صبى كتب:والله اسئلتي دايما معروفه ويا رب تكون خفيفة عليك يا عسل...
بسم الله نبدأ:

مرحب بيك اختى صبا وكل عام وانتى بخير
نمبر ون.أحلى موقف حصل ليك وتتمني تكراره؟؟

والله جد مامتزكر لى موقف حلو حصل لى
نمبر توو.أصعب موقف مرررا بيك؟؟

اصعب موقف مرة بى يوم وفاة والدى

نممبر سريي.أقرب عضو من المنتدى ليك؟؟

اقرب عضو سمرا النيل
نمبر فووورر.شيء لا تستطيعين العيش بدونه؟؟

سماع صوت اخى

نمبر فايف.احلى او أفضل مغني/ة عندك؟؟

الفنان المبدع محمد وردى
نمبر سككككس.أحلى فلم شفتيهو في حياتك؟؟

فلم هندى اسمو الحصاد

نمبر سفن اب.لونكي المفضلو لديكي؟؟؟

اللون الوردى
نمبر اييييت والاخييييير وزغردي.أكلتكي المفضلة شنو؟؟؟<<<ما ملاحظين جيت اتفلسفت بالتنجليزي <<<اتطورت صبووو

قراصة بملاح تقلية

ق

اها كدي كويس والله كنت عاوزه ازيد زياده لكن رحمتك والله يلا يا قمر نشوف جوابك......
والله بالجد الكرسي منور بيك].....

* معتصم * كتب:صباح / مساء الخير أميرة
وكل سنة وانتى طيبة ان شاء الله
والسنة الجاية زى ما عاوزة وتحقق أمانيك

كل سنة وانت طيب اخى معتصم

الاسئلة كتيرة بالحيل وان شاء الله المزاج يكون رايق
وتردى عليها وما تسبب ليك أى ضيق
أولا عاوزين تفسير ويكون مقنع لينا كلنا عن سبب التغيب
فى الفترة الأخيرة علما بأنك كنتى من أنشط الأعضاء فى المنتدى

اولا اشكرك على الثناء وثانيا وحقيقة طبعا انا ربة بيت وظروف رمضان والعيد بتختلف من الايام العادية وزائد عليها سفر ابو العيال السودان ومسئولية الاولاد هما السبب الاساسى فى غيابى ولكن من الان وصاعدا اوعدكم بعدم التغيب

ثانيا ربنا يرجع أبو العيال بالسلامة ان شاء الله من السودان
لكن خلاف رجوعو ما أهى أهم أمانيك

والله امنيتى الوحيده فى الدنيا انو ربنا يقدرنى اربى اولادى تربية سليمة ويتعلمو اعلى درجات التعليم ويكونو صالحين ينفعوا نفسهم وينفعو غيرهم

ثالثا أميرة ممكن تكتسب صداقة حقيقة من المنتديات أو الانترنت عامة
أو العكس ممكن أميرة تكتسب عداوات من الانترنت

والله بكل صراحة طبعا الصداقة الحقيقة دى معنى كبير جدا ومن الصعب انها توجد فى حياتنا الملموسه والمرئية عشان كدا ابدا من الصعب انشاء صداقات حقيقة عبر النت اوحتى عداوات لانك بتتعامل فى المنتدى مع اراء واقلام ربما ماتعطيك الحقيقة الكاملة لهذا الشخص عشان كده مهما حدث لايمكن ان تعادى او تتعمق فى صداقاتك عبر النت

أميرة أكثر شيئ بزعلها شنو

والله اكتر شىء بزعلنى وحقيقة عندما يتعامل معى شخص دون احترام لعقليتى وتفكيرى

وأكثر شيئ يفرحها

رضا والدتى عنى

ماذا أخذت منك الغربة وماذا أعطتك

جد الغربة اخذت منى الكثير يكفى انها تجعلك تتذوق الحياة بطعم واحد غير مميز باالاضافة الى ذلك فقدانك لاهلك وناسك واحساسك المستمر بانك غريب وعايش فى مكان مامكانك اما عطائها الحمد لله بس مقارنة بما اخذت منى هنا تصبح المعادلة صعبة

الناس بتقول لو ما مجبورة على الغربة ما اتغربت " مقتنعة بالكلام ده مية المية "

والله فعلا فى ناس مجبورة على الغربة بس ده فى حالة تكون الغربة مغطية وجايبة همها زى مابقولو اما قناعاتى فهى مامية المية

يعنى فى ناس فى السودان وضعهم أحسن ما يكون لكن يحبو الهجرة والهجر فقط

دى حقيقة بس النوع الزى ده مابحس انو فى غربة لانو عودتو السودان غير مشروطة يعنى فى اى لحظة حسه انو عايز يرجع برجع يعنى مابحس بغربة ده ممكن يسميها سياحه

وحصل يوم حسيتى انك عاوزة تمشى السودان اسى دى " فى لحظة معينة "

والله يامعتصم حصل وحصل كتير وبدون مبالغة انا الاحساس ده موجود جواى على طول

كلمة جميلة تقوليها لكل راعية بيت سودانية

طبعا المراة السودانية فى نظرى مميزة عن كل نساء العالم فى اهتمامها ببيتها وزوجها وابنائها وبقول ليهم كونو هكذا دائما بس مايتاثرو لى بالمسلسلات المدبلجة

ده قليل من كثير ولى معاك عودة تانى ان شاء الله

مها عمر كتب:أمورة مسائك عسل
حاسة انك سعيدة
لو الاجابة نعم أو لا الأسباب شنو
وممكن توصف لينا طبايع أميرةخارج نطاق المنتدى
ده لو كنتى تختلف عن طبايعك معانا بالمنتدى
ولى معاك رجعة تانية

* معتصم * كتب:أميرة كيفك
وكرسيك شايفو باااارد جدا وما فى واحد سخنك
لكن أنا ما بريحك

والله يامعتصم الناس ديل شايفاهم بخوفو فينى ساااااااكت وماشايفه حاجة

كم سؤال كدة على الماشي

أولا :
أميرة تورينا أمانيها
1/ أمنية تحققت

والله امنية تحقق انى اكون ام

2/ وأمنية أخرى لم تتحقق
ثانيا :

وامنية لم تتحقق انى اكمل قانون واكون محامية او قاضية

حاجات عجبتك يا أميرة فى منتدى أحلى زول

والله الحاجات العجبتنى بدايتك يااخى معتصم كانت مشجعة جدا وعرفت كيف تستغطب الاعضاء والناس كلها كان همها رفعة المنتدى وتطوره وكانت تتبادل الافكار والاراء وكان فى تواصل مستمر

وحاجات كمان ما عجبتك وتتمنى انها تتغير

صراحةً الشىء الماعاجبنى انك تدخل المنتدى وتعاين على الاعضاء المتواجدين تجد لااحد وبعض المواضيع تلقى عدد المشاهدات 20 وعدد المشاركات صفر

ثالثا :
أسباب نشاط الأعضاء فى المنتدى تفتكرى شنو

اولا الردود على المشاركات وتعقيب كاتب الموضوع على الردود بمخاطبة العضو باسمه ..تفقد الاعضاء والبحث عنهم بالرسائل البريديه من ادارة المنتدى ... تجدد المواضيع وكتابة مواضيع معاشه تشد انتباه القارى

والحوافز لتنشيط الاعضاء شنو

الاوسمه الدائمه فى لوحة تعريف العضو وتطور الالقاب مثل عضو جديد بعد كم مساهمة عضو نشيط عضو مميز عضو فعال عضو لامع وهكذا

رابعا :
عضو فى أحلى زول تتابعى مشاركاتو دائما لروعة هذه المشاركات

والله وبكل صدق انا اتابع كل مشاركات الاعضاء ولااميز واحد عن الاخر ولكن حقيقة افتقنا عضو مميز جدا وكاتب مفيد وكان له صولات وجولات كلنا نعرفها فى بداية نشاءة المنتدى وهو العضو ود ازهرى الله يطراه بالخير

وتعتقدى الفائدة من مشاركاته

ما أكتر عليك لكن لى معاك تانى عودة
ولك كل شكرى

زول حلفا كتب:أميرة
السلام عليكم ورحمة الله
أولاً أعتذر لوصولي المتأخر

مرحب بيك اخى زول حلفا ولايهمك ازنك معاك

وعشان ما احفرحفرة واجي أقع فيها في يوم من الايام حاخفف عليك الاسئلة

والله انت اعقل زول

بما أنك متزوجة يا اميرة رايك شنو في انشاء علاقات عبر الانترنت والمنتديات مع اشخاص من الجنسين

طبعا يااخى الزواج ماعندو اى علاقة براى لانو راي هو راي سوا متزوجه ام لا وبالتاكيد يااخى هناك الصالح والطالح فى اى شىء ولا اريد ان اتعمق فى هذا الموضوع لانه له كثير من الابعاد والملابسات والشى البحب اقولو انو التقيد والالتزام بالاخلاق والدين وعاداتنا وتقاليدنا السمحة فى كل العلاقات بين الجنسين عبر النت او خلافه يكون احسن وطبعا التربية بتلعب دور كبير فى ذلك

تقييمك للمنتدي شنو يااميرة وتفتكري ممكن نعمل شنو عشان يتطور اكتر من كده

والله تقيمى للمنتدى كان ماشى كويس جدا وبدا بداية موفقة بس ماعارفه الحصل شنو والشى الممكن يطور ويرفع المنتدى هو انو كل عضو يلزم نفسو بالتواجد فى المنتدى على الاقل ساعه فى اليوم عشان الواحد لمن يدخل مايلقاهو فاضى والشىء التانى اننا ندخل المنتدى من اجل الفائدة الفكرية وتبادل الاراء وليس من اجل مقابلة شخص معين او وجود فلان او عشان اشوف زيد من الناس كتب شنو فى موضوعى اوعلق كيف على ردى فقط واطلع وكتير من المنتديات دمرت بهذه الاسباب وفى المنتدى ايضا كان فى اعضاء انتهجو بهذا النهج والان ليس لهم اثر ... لازم كل واحد فينا يحس بمسئوليته نحو المنتدى ويبدا بنفسه وايد لايد تجدع بعيد

أكتر موضوع مطروح نال اعجابك واكتر موضوع نال عدم رضائك

والله معظم المواضيع المطروحه حلوة جدا بس اكتر مواضيع بتعجبنى المواضيع الجادة المعاشة البتعالج مشاكل فى المجتمع زى موضوع الزواج فى بلاد الغربة الطرحو اخونا معتصم

اخر سؤال لو سالتك عضوة في المنتدي تعمل شنو عشان تبقي زوجة ناجحة في بيتها حتقولي ليها شنو

عشان تكون زوجة ناجحة يكون بيتها وزوجها هو شغلها الشاغل وتحاول تتفهم زوجها كويس ويكون فى تفاهم تام بينهم واهم حاجة انها تقوم بواجباتها تجاه زوجها لدرجة انو لايستطيع ان يفعل شىء من دونها وتحترم اهله وتكرم ضيوفه ومع ذلك اهتمامها بنفسها وابنائها بعد كده بشيله فى عيونو وبتكون زوجة ناجحة

اتمني ما اكون تقلت عليك ولي عودة انشاء الله

اسامه مزاد بحرى كتب: والله اسئلتكم مويه بس وين الاسئله التقيله ياشباب بتشوفوا الاسئله بعد شويه بتكون كيف وانتى لمن اجيك راجع